L'Uffizi federal da statistica

Infurmaziuns daventan adina pli centralas en noss mund pli e pli cumplex – per s'orientar, per prender decisiuns e per planisar l'avegnir. Infurmaziuns influenzeschan la qualitad da las acziuns. Infurmaziuns statisticas èn oz impurtantas per prender decisiuns – saja quai en la politica (en parlaments, en executivas u en votaziuns), en l'economia u en il mintgadi. La statistica è sa sviluppada ad in element che porta transparenza en cuntraversas socialas e politicas.

Il UST è il center naziunal da cumpetenza per la statistica publica da la Svizra. El producescha e publitgescha infurmaziuns statisticas davart il stadi e davart il svilup da la populaziun, da l'economia, da la societad, da la furmaziun, dal spazi e da l'ambient. Questas infurmaziuns servan a la furmaziun da l'opiniun en la populaziun sco er a la planisaziun ed a la regulaziun da secturs centrals da la politica. Ellas prestan ina contribuziun impurtanta per in stadi modern e democratic.

Per accumpagnar la digitalisaziun da la societad e per far frunt a la dumonda creschenta d'infurmaziuns statisticas immediatamain disponiblas ha il UST cumplettà sia purschida. Dapi l'onn 2021 n'è il UST betg mo responsabel per la producziun d'infurmaziuns statisticas, mabain er per l'administraziun naziunala da las datas (NaDB) e per il svilup d'in Center da cumpetenzas per la scienza da datas (DSCC).