L'Uffizi federal da statistica

Sco center da cumpetenza naziunal da la statistica publica è il UST il lieu central en l'ecosistem da datas da la Svizra. El sustegna e rinforza l'entira administraziun publica e la gida ad ir enturn cun datas.

Ultra da sia fatschenta principala, la statistica, è il UST dapi l'onn 2021 er incumbensà cun la gestiun da datas e cun la scienza da datas.

Mintga di resultan enormas quantitads da datas da differentas funtaunas, che pon vegnir duvradas per producir la statistica publica. Quai pretenda novas metodas e novs instruments. Grazia a sia experientscha da plirs onns cun ir enturn cun datas e cun interagir sin ils trais champs d'incumbensas statistica, gestiun da datas e scienza da datas, agescha il UST permanentamain per sviluppar vinavant sias purschidas e ses servetschs.

Statistica

Il UST è activ sin basa da la Lescha federala da statistica. Las infurmaziuns statisticas ch'el ha elavurà, èn objectivas e fundadas e permettan da far cumparegliaziuns internaziunalas. La statistica publica infurmescha davart il stadi ed il svilup da la populaziun, da l'economia, da la societad, da la furmaziun, da la perscrutaziun, dal territori e da l'ambient en Svizra, ed è ina basa impurtanta per far ina debatta democratica che sa basa sin fatgs.

Chattar statisticas

Gestiun da datas

Cun la gestiun da datas creescha il UST infrastructuras e process per in barat da datas effizient entaifer l'administraziun. Per quest intent ston las datas esser interoperablas, quai vul dir ch'ellas ston per exempel vegnir descrittas en ina furma unitara. La gestiun da datas standardisescha, armonisescha e documentescha datas e stgaffescha las premissas necessarias per l'utilisaziun multipla da las datas.

Nationale Datenbewirtschaftung (NaDB) (Questa pagina datti mo per tudestg)

Scienza da datas

Il UST s'occupa da las sfidas dal preschent e da l'avegnir cun las novas metodas da la scienza da datas. Cun sias cumpetenzas en il sectur da la scienza da datas cusseglia el auters uffizis federals. Per promover svelt ed en moda persistenta l'applicaziun da l'intelligenza artifiziala e la fidanza en las novas tecnologias vegni collavurà tranter auter ad ina rait da cumpetenzas per intelligenza artifiziala, numnada CNAI.

Kompetenzzentrum für Datenwissenschaft DSCC (Questa pagina datti mo per tudestg)

Contact

Uffizi federal da statistica Espace de l'Europe 10
CH-2010 Neuchâtel
Svizra

Contact

Nota

Las paginas rumantschas porschan mo infurmaziuns parzialas. Per ils cuntegns cumplets As supplitgain nus da consultar las paginas en tudestg u franzos (guardar il link survart).

https://www.bfs.admin.ch/content/bfs/rm/home/ust/uffizi-federal-statistica.html