Communiqué de presse

La statistica svizra davart l'agid social en Grischun l'onn 2011 La quota d'agid social resta ina da las pli bassas en Svizra

Neuchâtel, 23.10.2012 (UST) - La quota d'agid social dal chantun Grischun è restada er l'onn 2011 ina da las pli bassas en Svizra. Sco l'onn avant han 1,1 pertschient da la populaziun grischuna duvrà prestaziuns da l'agid social. La quota da las persunas che retiran agid social en las categorias da vegliadetgna 46 fin 55 e 56 fin 64 onns è s'augmentada cuntinuadamain quests ultims onns. La quota da persunas estras che dovran agid social è sa diminuida dapi l'onn 2008 ed importa l'onn 2011 anc 2,1 pertschient.

En congual cun chantuns svizzers che han structuras sumegliantas resta la quota d'agid social vinavant fitg bassa en Grischun. Mo 1,1 pertschient da la populaziun grischuna dovran prestaziuns da l'agid social. Quai èn 2'179 persunas, 28 pli pauc che l'onn 2010. Dal 2009 al 2011 era il dumber da cas en il chantun Grischun sin in nivel cumparegliabel, il dumber da persunas è dentant sa diminuì. In cas d'agid social consista damai vi e pli da main persunas. Quest svilup sa demussa er en la structura dals cas d'agid social. Ils cas d'ina persuna s'augmentan, ils cas da pèrs cun uffants diminueschan.

Il dumber da persunas pli veglias che dovran agid social augmenta

La quota da las persunas che retiran agid social en las categorias da vegliadetgna 46 fin 55 e 56 fin 64 è s'augmentada quests ultims onns. Dal 2008 al 2009 èn las quotas anc sa diminuidas in pau, ma dapi il 2009 (14,6 resp. 6,7 pertschient) muntan ellas dentant mintg'onn ed importan 15,7 resp. 8,6 pertschient l'onn 2011. Quest augment signifitgescha che persunas pli veglias han vi e pli difficultads en congual cun autras gruppas da vegliadetgna, per exempel er da chattar l'access al martgà da lavur.

La quota da persunas estras che dovran agid social sa diminuescha vinavant

Entant che la quota da persunas svizras che dovran agid social è restada stabila ils ultims dus onns, è la quota da las persunas estras sa diminuida. L'onn 2008 retiravan anc 3,1 da las persunas senza passaport svizzer agid social, l'onn 2011 eran quai 2,1 pertschient. En quella perioda è la quota da persunas svizras che dovran agid social sa diminuida dad 1,0 a 0,9 pertschient.

Diminuziun dals cas che cuvran 100% da lur custs da viver cun l'agid social

La quota da dependenza d'in cas signifitga la cumpart dal total dals custs da viver che vegn cuvrida cun l'agid social. La quota dals cas per ils quals l'agid social sto cuvrir 100% dals custs da viver (quota da dependenza 1), sa diminuescha en Grischun dapi onns. Ina dependenza da 100% avevan l'onn 2008 anc var 35% da tut ils cas d'agid social. L'onn 2011 è questa quota da dependenza sa sbassada sut 30 pertschient. La diminuziun dals cas cun ina dependenza totala mussa che adina dapli persunas che dovran agid social pon cuvrir sezzas ina part da lur custs da viver gudagnond daners ubain ch'ellas vegnan sustegnidas anc cun autras prestaziuns socialas.

Retratgas simplas u cumbinadas da l'agid social supplementar

L'onn 2011 è vegnida calculada per l'emprima giada la quota da las persunas che dovran agid social supplementar. Questa quota resguarda tut las persunas che han duvrà l'onn 2011 durant almain in mais ina da las prestaziuns socialas suandantas: agid social economic, contribuziuns da maternitad, pajaments anticipads d'aliments. Persunas che han duvrà dapli ch'ina da questas prestaziuns vegnan quintadas mo ina giada. L'onn 2011 muntava la quota da persunas che dovran agid social supplementar a 1,6 pertschient en Grischun. Mo 11,2 pertschient da tut ils cas cun agid social economic dovran er anc contribuziuns da maternitad u pajaments anticipads d'aliments. Questa quota è marcantamain pli auta sch'ins basa la calculaziun sin ils cas che dovran contribuziuns da maternitad. 35 pertschient da quests cas dovran ultra da quai er agid social e 2 ulteriurs pertschient dovran er anc pajaments anticipads d'aliments.


 

Télécharger communiqué de presse

La quota d'agid social resta ina da las pli bassas en Svizra
(PDF, 4 pages, 73 kB)


Autres langues


Documents associés

Die Schweizerische Sozialhilfestatistik im Kanton Graubünden 2011


Tags

femme mère couple

 

https://www.bfs.admin.ch/content/bfs/fr/home/actualites/quoi-de-neuf.assetdetail.36118.html