La statistica svizra d'agid social en il chantun Grischun l'onn 2013 La quota d'agid social en il chantun Grischun è levamain pli auta
Cuira/Neuchâtel, 09-10-2014 (UST) - L'onn 2013 èn vegnidas sustegnidas en il chantun Grischun 1460 cas tras l'agid social. Quai correspunda a 2325 persunas. Cumpareglià cun l'onn precedent èn quai bundant 140 persunas resp. 90 cas dapli. Per l'emprima giada dapi l'onn 2010 è er s'augmentada la quota d'agid social dal chantun - dad 1,1 ad 1,2 pertschient. Anc adina è il Grischun tranter ils chantuns cun las quotas las pli bassas da tut la Svizra. Quai mussan ils resultats da la statistica svizra d'agid social da l'Uffizi federal da statistica (UST).
Dapi l'onn 2011 sa mussa er in augment da persunas cun activitad da gudogn. Durant la medema perioda è sa reducida la quota da persunas senza activitad da gudogn. Latiers tutgan persunas en scolaziun (senza emprendists), persunas che lavuran en il tegnairchasa, persunas pensiunadas, persunas temporarmain incapablas da lavurar, persunas permanentamain invalidas sco er persunas che n'han naginas schanzas sin il martgà da lavur. Svilup da la structura dals cas Dapi 3 onns crescha la quota da cas d'ina persuna. En il fratemp èn quai stgars dus terzs dals cas. Sco cas d'ina persuna vegnan considerads cas da persunas che vivan sulettas, ma er cas da persunas che na vivan betg sulettas. Questas ultimas èn persunas che furman in agen cas d'agid social, che vivan dentant ensemen cun ina u pliras autras persunas, per exempel en ina cuminanza d'abitar. Durant la medema perioda è sa reducida la quota da persunas ch'educheschan sulettas. En il chantun Grischun è questa quota tar 20,5 pertschient. 9,4 pertschient da tut ils cas èn cas da pèrs cun uffants, 4,2 pertschient cas da pèrs senza uffants. Bunamain in terz (28,7%) da tut las persunas che retiran agid social èn uffants tranter 0 e 17 onns.
Download press release
La quota d'agid social en il chantun Grischun è levamain pli auta
(PDF, 4 pages, 80 kB)
Other languages
Associated documents
La statistica svizra d'agid social en il chantun Grischun l'onn 2013
Tags
couple