Medienmitteilung

Elecziuns federalas 2019: Analisa da la fermezza da las partidas e dals sezs

Elecziuns federalas: Gudogn da sezs il pli grond tras ils Verds dapi l'introducziun da las elecziuns da proporz

29.11.2019 - A chaschun da las elecziuns federalas dals 20 d'october 2019 ha la Partida ecologica svizra (PES) augmentà sia quota da votantas e votants per 6,1 puncts procentuals a tut en tut 13,2 % e la Partida verd-liberala (PVL) ha pudì auzar sia quota per 3,2 puncts procentuals a 7,8 % (resp. Da 7 sin 16 sezs). Cun 17 sezs supplementars èn ils Verds da nov la quart gronda partida en il Cussegl naziunal. Els han gudagnà il dumber il pli grond da sezs ch'ina partida ha gudagnà insumma dapi l'introducziun da l'elecziun da proporz l'onn 1919. L'Uffizi federal da statistica (UST) metta a disposiziun ils resultats definitivs detagliads sco er in'analisa pli profunda da las elecziuns.

Pers il dumber il pli grond da sezs a chaschun da las elecziuns dal Cussegl naziunal 2019 ha la Partida populara svizra (PPS), che aveva anc cuntanschì en las elecziuns da l'onn 2015 l'augment il pli grond. Sia quota da votantas e votants è sa reducida per 3,8 puncts procentuals, ed ella ha pers 12 sezs. Tuttina resta ella lunschor la partida la pli ferma en il Cussegl naziunal cun 25,6 % da las vuschs.

Las partidas dal Cussegl federal daventan pli deblas

Ultra da la PPS han er las ulteriuras trais partidas dal Cussegl federal pers forza electorala e sezs. La quota da votantas e votants da la Partida socialdemocratica (PS) è sa reducida per 2,0 puncts procentuals a 16,8 %, quella da la Partida liberaldemocratica (PLD) per 1,3 puncts a 15,1 % e quella da la Partida cristiandemocratica (PCD) per 0,3 puncts ad 11,4 %. En cifras absolutas èn quai ils resultats ils pli debels en l'istorgia da questas trais partidas. La PS e la PLD han pers mintgamai quatter sezs ed han pia anc 39 resp. 29 sezs, entant che la PCD ha reducì ses dumber da sezs per dus a 25 sezs.

Las quatter partidas dal Cussegl federal han tut en tut 146 sezs en il Cussegl naziunal, quai correspunda ad ina quota da votantas e votants da 68,9 %. Quest resultat sumeglia quel da las elecziuns da l'onn 1991, cur che las partidas dal Cussegl federal avevan cuntanschì 69,4 % da las vuschs e 145 sezs.

Resultats da record per las partidas verdas

La PES ha realisà cun 13,2 % ses meglier resultat electoral sin plaun naziunal dapi che la partida exista. La quota da vuschs la pli auta fin ussa aveva ella cuntanschì l'onn 2007 cun 9,6 %. Cumpareglià cun l'onn 2015 han ils Verds pudì augmentar lur forza electorala per 6,1 puncts procentuals. En puncts procentuals è quai il segund grond augment suenter ils 7,6 puncts procentuals istorics (15 sezs gudagnads) da la PPS tranter 1995 e 1999.
La PVL ha pudì augmentar sia quota da votantas e votants per 3,2 puncts procentuals en cumparegliaziun cun las elecziuns dal Cussegl naziunal da l'onn 2015 ed ha – cun 7,8 % da las vuschs – medemamain realisà ses meglier resultat electoral fin ussa.

Resultats definitivs

Questas cifras sco er numerus ulteriurs resultats èn cuntegnids en la publicaziun davart las elecziuns dal Cussegl naziunal 2019. Tranter auter vegnan preschentads ils resultats electorals da las singulas partidas ed analisads en il decurs dals onns 1971 fin 2019 sco er tenor chantun e regiun linguistica. Tut ils resultats definitivs èn disponibels en furma electronica sin il portal d'internet dal UST. Sut il tema politica pon vegnir consultadas numerusas infurmaziuns statisticas davart la fermezza da las partidas e davart ils sezs en furma da chartas, da tabellas, da datas e da graficas.


 

Download Medienmitteilung

Elecziuns federalas 2019: Analisa da la fermezza da las partidas e dals sezs
(PDF, 3 Seiten, 354 kB)


Weitere Sprachen


Verwandte Dokumente

Eidgenössische Wahlen 2019: Analyse der Parteistärken und der Mandate


 

https://www.bfs.admin.ch/content/bfs/de/home/aktuell/medienmitteilungen.assetdetail.11068951.html